تغيرات كتير بتقابليها في أول أسبوع بعد الولادة، منها طبيعي ومنها لأ، محتاجة تعرفي تتعاملي معاها إزاي وامتي تزوري استشارية الرضاعة الطبيعية أو طبيب مختص حسب نوع المشكلة اللي واجهتك.
بشكل مبدأي دايمًا بننصح يكون فيه زيارة لاستشارية الرضاعة الطبيعية في الشهور الأخيرة من الحمل، تتعلمي فيه وضعيات الرضاعة الصحيحة وطريقة التقام الطفل للثدي، وتعلمك تعملي إيه في أول ساعات الولادة الذهبية. تعالي أبدأ معاكي من الأول…
أول لبن بينزل منك للبيبي هو لبن السرسوب، وده بيتكون في الثدي أثناء الحمل. السرسوب بطبيعته كميته قليلة لأنه مناسب لاحتياجات طفلك في الأيام الأولى من عمره، ورغم كميته القليلة دي إلا إنه يعتبر أول جرعة مناعية لطفلك لأنه غني بالأجسام المضادة وده اللي بيديه لونه الأصفر المميز، فمتستغربيش إن لونه مش أبيض وتفتكري اللبن لسه مجاش.
وبعدين يجي اللبن اللي لونه أبيض ما بين اليوم الثالث لليوم الخامس بعد الولادة، ساعات بنسميها هجمة اللبن، فيها كمية اللبن بتزيد ولونه وخواصه بتتغير، في الوقت ده مهم جدًا تكوني اتمرنتي انتي وطفلك علي وضع الرضاعة والالتقام، ولو حصل كلكعة أو تكتل في الثدي تبقى مستعدة بطريقة تعصير الثدي وإزاي تدي لبنك المتعصر لطفلك من غير ما تستخدمي الببرونة، خاصة في أول 6 أسابيع من عمر الطفل علشان تتجنبي التباس الحلمة.
التباس الحلمة يعني طفلك يتلخبط ما بين طريقة الرضاعة بالببرونة والثدي، ويبدأ يرفض الرضاعة الطبيعية المباشرة، بس خلي بالك حتي لو ده حصل زوري استشارية الرضاعة الطبيعية علشان تساعدك تعالجي المشكلة ديه .
مهم كمان تعرفي إزاي هتتابعي طفلك بعد الولادة علشان تتطمني إنه بياخد كفايته من اللبن أولاً: الوزن طبيعي في أول اسبوع بعد الولادة الطفل يفقد من 7-10% من وزنه، ويستعيدهم خلال الاسبوع التالي، بعد كده هنتابع وزنه بمنحنى النمو. ثانيًا: مهم جدًا تتابعي الإخراج سواء بول أو براز لأن ده حيبقي مؤشر تلبية احتياجه تتابعي ايه في الإخراج؟ اللون والقوام والكمية وعدد المرات.. مثلاً لون البول الغامق أو البرتقالي الطوبي ده علامة جفاف.. وده مش معناه إنك تدخلي صناعي بس مهم تزوري استشارية الرضاعة الطبيعية تتاكد من وضع الرضاعة وتقيم حالة البيبي وتساعدك تزودي كمية لبنك اللي بيوصل له بالنسبة للبراز فلونه هيتغير من الأسود للأخضر للأصفر الذهبي خلال أول اسبوع، وقوامه هيبقى زي المعجون، وممكن يخرج البراز بعد كل مرة رضاعة.. وممكن مرة واحدة في اليوم، المهم ميكونش خروجه مؤلم أو فيه دم أو مخاط. ثالثًا: النوم طفلك لسه ما عندهوش ساعة بيولوجية فمش بننصح بروتين للنوم ولا للرضاعة، ومهم جدًا تستجيبي لرغباته وترضعيه عند ظهور علامات الجوع خاصة المبكرة، لما يبدأ يحرك راسه ويفتح بقه، مش لازم تستني لما يعيط. ولو بدأ العصبية والعياط هتحتاجي تهديه الأول قبل الرضاعة سواء بملامسة الجلد للجلد أو الحضن والطبطبة .
و يمكنك ان تحصلي على المساعدة و التقييم السليم و الدعم بزيارة الاستشاري الدولي للرضاعة الطبيعية الأقرب اليكي
